Сайнчугай овогтой Сүхбаатар нь Дорнод аймгийн Баянтүмэн суманд 1959 онд төрсөн, бүрэн бус дунд боловсролтой, жолооч, малчин мэргэжилтэй хүн юм. 1967-1975 онд Дорнод аймгийн Баянтүмэн сумын найман жилийн дунд сургуулийг төгсөж МХЗЭвлэлийн илгээлтээр мал аж ахуйд Баянтүмэн сумын “Баясгалант хөдөлмөр нэгдлийн “Хотонт” бригадад эцгийнхээ хариуцсан хонин суурьт туслах малчнаар гарсан хүн юм.  1977-1980 онд цэргийн албыг хааж ирээд малчнаараа ажиллаж байгаад 1981 онд нутгийн бүсгүй Хооламын Мөнхтуяатай гэр бүл болон амьдралаа зохиосон байна. С.Сүхбаатар нь өөрийн аав Сайнчугай болон нутгийнхаа ахмад малчидын туршлагаас суралцаж мал маллах өөрийн гэсэн арга барилтай болсон хүн билээ. Тэрээр хавраас  малдаа махан бадайлага авхуулахаас эхлэн тарга хүчний аяндаа гардаг хүн. Зун намрын улирлуудад малдаа тарга хүч сайн авхуулж өвөлжилт, хаваржилтын бэлтгэлээ бүрэн хангаснаар мал сүргээ онд сайн оруулж зүй бусын хорогдол гаргахгүй ажиллаж сумын 7 удаагийн, аймгийн 2 удаагийн аварга болж байсан байна. С.Сүхбаатар, гэр бүл Х.Мөнхтуяа нарын хөдөлмөрийг үнэлж 2017 онд “Улсын сайн малчин” гэдэг малчин хүний өндөр нэр хүндтэй цолыг  ХХААХҮ-ийн яамны сайд Бурмаа аймаг, сумын удирдлагуудтай ирж малчдын цагаан сарын үеэр  гардууллаа. Улсын сайн малчин С.Сүхбаатар, Х.Мөнхтуяа нар нь өөрийн хүү С.Эдэнэбаатар, хүргэн хүүхнүүддээ  болон багийнхаа залуу малчдад мал маллагааны зөвлөгөө өгч ажиллахын зэрэгцээ мал сүрэг цөөнтэй зарим өрхүүдийг малжихад нь гар татахгүй тусалж, төв суурингийн зарим айлуудын малыг өөрийнхөө малтай хамт маллаж түмэнд тус болж явдаг буянтай сайхан хүмүүс юм. С.Сүхбаатарын хөдөлмөр бүтээлийг төр засгаас үнэлж МХЗЭвлэлийн төв хорооны “Тэргүүний малчин залуу” алтан медаль, “Ардын хувьсгалийн 70,80 жилийн ойн медаль, Ардчилсан хувьсгалийн 20 жилийн ойн медалиар шагнагдсан байна.